Предизвик – Редизајн на јавни зелени површини

Учествувајте активно во озеленувањето на Скопје со Скопје Лаб. Центарот на иновации на Град Скопје ве повикува заедно да го направиме Скопје поубав град за живеење со културна и здрава животна средина.

Тимот Скопје Лаб почна да работи на иницијатива за дизајнирање на зелени јавни површини/паркови, кои потоа Град Скопје ќе ги ревитализира и озелени (без поплочување или градење), но и ќе се обиде да ги „оживее“ приказните од минатото на тие површини.

Ова иницијатива дојде на предлог од наш граѓанин кој имаше мапирано  20тина локации во градот на кои му треба ревитализација. Во оваа фаза ќе опфатиме 12 локации по што ќе се помине на следна фаза односно дизајнирање и уредување на останатите.

Со цел уредување и озеленување на овие површини согласно ваши потреби би сакале да ги слушнеме вашите идеи но и приказните кои ги знаете за една или повеќе од нив.

Предвидени локации во оваа фаза:

  1. Зелен простор позади Три Бисери кај Авицена лабораторија.
  2. Зелениот простор спроти Рамстор на бул. Јане Сандански
  3. Зелен простор до Палма Аеродром
  4. Зелен простор спроти Сити Мол – кај што минува последна 19ка
  5. Зелен простор до Пожарна кај Веро
  6. Зелен простор позади поликлиника Идадија
  7. Зелен простор кај Фурна 1 што води накај Мин. За Економија
  8. Зелен простор кај Мартиновски пред мостот кај Кале
  9. Зелен простор до мост Мајка Тереза што води накај Холидеј ИН
  10. Зелен простор до ЦРМ накај мост Мајка Тереза
  11. Зелен простор спроти СП Планет пред КАМ маркет
  12. Зелениот простор спроти ЗОО “Скопје”

Сите локации се претставени на апликацијата StoryMap (https://arcg.is/1SznDr) каде може да ги погледнете, да се инспирирате или да ги посетите ако живеете во нивна близина, и потоа да помогнете со ваша идеја за просторот. Линкот го има дадено и во самиот прашалник.

Доколку сакате да помогнете во оваа иницијатива Ве молиме одговорете го следниот прашалник каде може да го дадете вашиот предлог за еднa или две од предложените локации – Линк до прашалник.

Доколку имате идеи и предлози за повеќе од две од предложените локации ве молиме директно доставете ги вашите предлози на [email protected]. Вашиот предлог може да е во вид на слика, цртеж, дизајн, или едноставно предлог идеја за што се е потребно за просторот да се оживее и ги задоволи потребите на граѓаните.

Доколку иницијативата покаже успех континуирано ќе се работи на мапирање и дизајнирање на нови јавни површини во Скопје кои може да се уредат согласно потребите на граѓаните.

Се надеваме на вашата помош заеднички да го разубавиме нашиот град!

СкопјеЛаб дел од семинарот „Иновативно брендирање на градовите“

Во Музејот на современа уметност вчера и денеска (05 и 06.07.2018 година) се одржа семинарот „Иновативно брендирање на градовите“ – Градење и комуницирање на компетитивни локални идентитети.

Семинарот е во организација на „Лабораторија за урбано живеење“ (Urban living lab) и се организира во рамките на европскиот проект РОК – регенерација и оптимизација на културното наследство во креативните градови (ROCK) финансиран од Европската програма за истражување и иновации Хоризонт 2020.

Проектот „РОК“ се фокусира на историските центри во градовите кои ќе ги користи како „теренски лаборатории” на културното наследство и да покаже како тоа може да биде уникатен и моќен двигател на возобновување, одржлив развој и економски раст за целиот град. Во овој проект учествуваат 36 партнери од 13 земји.

Градоначалникот Шилегов го отвори семинарот и во воведната сесија ги претстави неговите визии во која насока го гледа Скопје.

На овој иновативен семинар, експертот Мигуел Ривас од меѓународната консултантска компанија ТАСО го претстави концептот на менаџирање на иновативен начин на брендирање на градовите и тоа не само од перспектива на комерцијални маркетинг практики туку и преку интегриран пристап на урбан развој.

Главната цел на овој семинар беше да потенцира дека брендирањето на градот е основа за нов начин на промоција и развој на градовите. Истовремено, овој семинар претставува прв чекор од процесот на брендирање на Град Скопје. Процес во кој Градот Скопје ќе работи со сите засегнати страни со цел креирање на заедничка приказна како основа за брендирање на главниот град. Во оваа фаза, Градот Скопје ги повикува сите засегнати страни со свои предлози да учествуваат во креирањето на новата приказна.

На семинарот учествуваа претставници од градската администрација, агенцијата за промоција на туризмот, јавните претпријатија, културните институции, архитекти, урбанисти, туристички работници и графички дизајнери.

Град Скопје и УНДП заедно во справувањето со климатските промени

Градоначалникот Шилегов и Луиза Винтон, Постојан претставник на УНДП во Македонија, денеска го потпишаа договорот за соработка помеѓу Град Скопје и Програмата за развој на Обединетите нации (УНДП) за реализација на проектот „Отпорно Скопје: поголема одржливост и иновации за справување со климатските промени”.

Со овој договор е предвидено продолжување на соработката во рамките на проектот „Отпорно Скопје: поголема одржливост и иновации за справување со климатските промени”, и притоа е предвидена реализација на голем број активности од областа на заштитата на животната средина, особено заштитата од климатските промени и зголемување на отпорноста на Скопје, но и активности за воведување иновативни пристапи во секојдневната работа и поефикасни услуги за своите граѓани.

Со потпишувањето на овој договор Градот Скопје се обврзува да обезбеди подобра животна средина, да ја штитиме природата и биодиверзитетот во градот и во околината, да ги подобриме условите за живот, да преземеме активности за справување со климатските промени и да ги вклучуваме граѓаните во носењето на одлуките и следејќи ги нивните потреби да обезбедиме подобар живот за сите – кажа Шилегов.

Градоначалникот Шилегов додаде дека дел од определбите на овој договор се преземање на конкретни активности за подобрување на квалитетот на воздухот и водата, но и зафати за подобрување на зеленилото во Градот.

Длабоко сме свесни за значењето на зеленилото од сите аспекти, ги предвидуваме сите потребни мерки за негова заштита. Наша цел е преку интензивно зазеленување на делови од градот да го надоместиме изгубеното зеленило, како и на дополнување на оние локации каде што истото постои. Оваа година Градот Скопје има предвидено засадување на 10.000 нови висококвалитетни листопадни, како и над 2.000 зимзелени садници на територијата на Скопје. Дополнително, преземаме конкретни активности за изградба на зелен кров во Градскиот трговски центар, се надевам дека до крајот на оваа година ќе ги завршиме сите административни процедури и од наредната година би почнала неговата реализација – додаде Шилегов.

Постојаниот претставник на УНДП во Македонија Витон изјави дека со овој договор се продолжува и интензивира соработката со Градот Скопје, која изминативе неколку години резултира со изработката на поголем број студии, стратегии, како и отворањето на Центар за иновации на Град Скопје „Скопје Лаб“.

Потпишувањето на овој договор е продолжување на едно многу продуктивно партнерство кое го имаме со Градот Скопје. Со овој договор нашата соработка се продолжува за период од 18 месеци, а истиот е во вредност од 720.000 долари. Активностите на овој проект ќе се одвиваат во две насоки, првата е подобрување на еколошката одржливост на градот, каде што ќе продолжиме да работиме на научни истражувања, а резултатите од овие научни истражувања ќе ги имплементираме преку реализација на пилот-проекти – кажа Витон.

Покана од градоначалникот на Град Скопје, г-дин. Петре Шилегов

Градоначалникот на Град Скопје, Петре Шилегов, го претставува Центарот за иновации на Град Скопје – СкопјеЛаб и Ве поканува Вас граѓаните, заедно да ги дефинираме потребите и да ги насочиме инвестициите кон подобри заедничките решенија.

Да ги отвориме вратите за вашите идеи, таленти и вештини и заедно да одлучуваме како ќе расте и ќе се развива нашиот град. Сакаме да ни помогнете, да го искористиме развојот на технологијата за да го подобриме квалитетот на живот на сите жители на Скопје.

Овој Центар е еден важен чекор кон заедничка визија за нашето Скопје и затоа ве поканувам: Повелете, посетете не, дојдете да поразговараме за вашите предлози и решенија.

 

Работна средба на тимот на СкопјеЛаб

На 13 април од 14 до 16:30 часот во просториите на Град Скопје тимот на СкопјеЛаб одржа работна средба на која беа претставени новите членови од јавната администрација кои се приклучија на тимот, планот и активностите за следниот период и краток осврт беше даден на реализираните активности и проекти до сега.

Планот на активности на СкопјеЛаб за оваа година беше неодамна финализиран во соработка со раководството на градот, и целта е истиот да допринесе кон подобрување на комуникацијата и соработката со граѓаните и бизнисите, нивно вклучување како активни чинители во процесот на дизајнирање и креирање на услуги/проекти, а воедно и зајакнување на капацитетите на јавната администрација во градот за иновации, нивно поттикнување и развој.

Моменталниот тим на СкопјеЛаб се состои од 15тина членови од јавната администрација на Град Скопје кои доаѓаат од различни сектори, 3 клучни членови и неколку надворешни експерти.

Анализа на корисничко искуство на Националниот портал за е-услуги

Центарот за иновации на Град Скопје – СкопјеЛаб во соработка со Министерството за информатичко општество и администрација (МИОА) и УНДП во периодот 21-29 декември работат на тестирање на Националниот Портал за е-услуги кој ќе биде објавен во 2018 година а кој ќе служи како единствена точка на контакт со државните институции со цел зголемување на нивната ефикасност, обезбедување побрзи и поедноставни услуги.

Целта на тестирањето е да со види корисничко (не техничко) искуство при користење на порталот со цел истиот да биде дизајниран на начин на кој ќе им служи на сите граѓани.

Тестирањето се спроведува (25-26ти декември) во просториите на Центарот за социјални иновации (Social Innovation Hub) на ФИНКИ кои како пријател на иницијативата излегоа во пресрет и ја препознаа вредноста на активноста.

Во овој период 40тина корисници од различни групи (пол, возраст, ниво на дигитална писменост, степен на попреченост, националност, итн.) се поканети да го тестираат порталот и да дадат нивно мислење и коментари за корисноста, начинот на презентација и структура на информациите, типот на информации кои се нудат, дизајн, читливост, разбирање итн. Ваквиот начин на дизајнирање со фокус на корисникот кој е во основата на работењето на СкопјеЛаб е особено важен за исполнување на целите и задоволување на потребите на корисниците.

Тестирањето на Националниот Портал за е-услуги “Една точка на услуги” е втората активност која произлегува од меморандумот за соработка кој се потпиша помеѓу МИОА и УНДП за кој повеќе информации може да најдете овде – http://www.mio.gov.mk/?q=node/4529.

Мапирање на искуство на корисникот при користење на просторот “Една точка на услуги”

СкопјеЛаб заедно со Студио TILT од Англија (http://studiotilt.com/) во текот на декември работи на тестирање на искуството на граѓаните со просторот “Една точка на услуги” при користење на јавните услуги кои ќе бидат достапни таму.

Во соработка со МИОА како надлежна институција за обезбедување на оваа услуга и со поддршка од УНДП овој проект има за цел да осигура просторот каде ќе се даваат овие услуги да ги задоволува потребите на сите граѓани а воедно и помага за нивно брзо, ефикасно и ефективно извршување.
Преку користење на прототип решенија при мапирање на корисничко искуство активноста ќе резултира со извештај со препораки за дизајнирање на просторот кој ќе одговара на потребите на корисниците.

За таа цел 20тина граѓани од различни групи (пол, возраст, различни типови на хендикеп, степен на попреченост, националност, итн.) беа поканети да го тестираат просторот каде ќе се даваат услугите. Ваквиот начин на дизајнирање со фокус на корисникот кој е во основата на работењето на СкопјеЛаб е особено важен за исполнување на целите и задоволување на потребите на корисниците.

Тестирањето на просторот “Една точка на услуги” е првата активност која произлегува од меморандумот за соработка кој се потпиша помеѓу МИОА и УНДП за кој повеќе информации може да најдете овде – http://www.mio.gov.mk/?q=node/4529.

Подолу може да видите фотографии кои беа направени за време на тестирањето.

Работилница за граѓанските организации – “Дизајнирање на проекти со користење на иновативна методологија”

СкопјеЛаб – Центарот за иновации на Град Скопје на 12 декември со почеток од 10 часот организира работилница за граѓанските организации на тема “Дизајнирање на проекти со користење на иновативна методологија фокусирана на потребите на корисникот (Design Thinking)”.  Работилницата ќе се одржи во просториите на НВО центар Скопје, МКЦ 1-КАТ.

Работилницата има за цел да ги запознае граѓанските организации со основите на “Design Thinking” –  иновативна методологија која помага полесно да се идентификуваат барањата на граѓаните и целните групи за дизајнирање проекти кои соодветствуваат на истите, генерираат подобри резултати и отвораат нови можности.

За време на работилницата ќе се работи и на мапирање на процесот и нивото на задоволство на граѓанските организации од досегашната соработка со одделението за соработка со граѓански организации – Град Скопје. Ваквите активности ќе помогнат во следниот период да се направи подобрување на процесот на комуникација помеѓу градот и граѓанските организации, начинот на дизајнирање на повици за грантови и пропратните процедури.

Доколку сметате дека работилницата е од ваш интерес пријавете присуство најдоцна до 11 декември (понеделник), 13 часот на [email protected]. На работилницата организациите може да учествуваат со најмногу 2ца претставници.

Петта последна работилница за изнаоѓање на решенија за справувањето со проблемот со отпадот

На 30 ти ноември, четврток од 12:30 до 16:30 часот во Големата сала на Совет на Град Скопје  Скопје ќе се одржи петтата и последна работилница за изнаоѓање на решенија за справувањето со проблемот со отпадот.

Целта на оваа работилница е да се доработат веќе дефинираните прототип решенија и да се развијат во нивната конечна форма. Овие решенија ќе допринесат во намалување на проблемот со отпадот  и полесно справување со истиот.

На ова работилница ќе продолжиме да работиме со ист профил на учесници, претставници на релевантните институции и сектори како што се:  претставници од ромската заедница – неформални собирачи на отпад, граѓани, Град Скопје, ЈП Комунална Хигиена, Пакомак, Министерство за животна средина и просторно планирање, Министерство за труд и социјална политика, Агенција за храна и ветеринарство, Депонија Дрисла, граѓански организации, приватни компании кои работат на собирање отпад, како и индивидуални граѓани кои се заинтересирани активно да се вклучат во изнаоѓање на решението за овој битен предизвик на нашето општество.

Она што се очекува од ова последна работилница е финализирање на прототип решенијата:

    • Поставување на временската рамка
    • Идентификување на сите активности и чекори потребни за спроведувањето на прототипот
    • Дефинирање на потребниот буџет

Работилницата е отворена и за граѓани па доколку имате интерес да се вклучите пријавете интерес за учество најдоцна до 24ти ноември  на  [email protected].

Со задоволство ве очекуваме да продолжиме да работиме заедно!

Повеќе информации за проектот може да најдете овде.

Четврта работилница за изнаоѓање на решенија за справувањето со проблемот со отпадот

На 27ми ноември, понеделник од 12:30 до 16:30 часот во просториите на УНДП (Јордан Хаџи Константинов Џинот, 23) Скопје ќе се одржи четвртата од серијата пет работилници за изнаоѓање на решенија за справувањето со проблемот со отпадот.

Целта на оваа работилница е предложените идеи од претходната работилница да се развијат во вид на прототип решенија кои ќе допринесат кон намалување на отпадот од домаќинствата, негово подобро одложување и собирање.

На ова работилница ќе продолжиме да работиме со ист профил на учесници, претставници на релевантните институции и сектори како што се: претставници од ромската заедница – неформални собирачи на отпад, граѓани, Град Скопје, ЈП Комунална Хигиена, Пакомак, Министерство за животна средина и просторно планирање, Министерство за труд и социјална политика, Агенција за храна и ветеринарство, Депонија Дрисла, граѓански организации, приватни компании кои работат на собирање отпад, како и индивидуални граѓани кои се заинтересирани активно да се вклучат во изнаоѓање на решението за овој битен предизвик на нашето општество.

Очекувани резултати од четвртата работилница се:

• Развивање на прототип решенија и тоа
o Дефинирање на составни елементи на решението
o Поставување на временската рамка
o Идентификување на сите активности и чекори потребни за спроведувањето на
прототипот
o Дефинирање на потребниот буџет

Работилницата е отворена и за граѓани па доколку имате интерес да се вклучите пријавете интерес за учество најдоцна до 24ти ноември на  [email protected] Со задоволство ве очекуваме да продолжиме да работиме заедно!

Повеќе информации за проектот може да најдете овде.